Sýknaður af ákæru um birtingu áfengisauglýsinga

Karlmaður var í Hæstarétti í dag sýknaður af ákæru um áfengislagabrot með því að hafa sem framkvæmdastjóri tiltekins fyrirtækis látið birta auglýsingar á áfengum bjór í tveimur dagblöðum.

Í dómi Hæstaréttar var vísað til þess að í tveimur nánar tilgreindum dómum hefði verið mörkuð sú stefna að minni kröfur væru gerðar til að höfundur teldist hafa nafngreint sig. Tekið var fram að þær auglýsingar sem ákært var fyrir nú bæru hvorki með sér nafn höfundar né auglýsanda.

Þá var ekki talið að í þeim væru auðkenni sem beint eða óbeint vísuðu til mannsins eða þess fyrirtækis sem hann er framkvæmdastjóri hjá, en svo hafði verið í þeim auglýsingum sem fjallað var um í tilvitnuðum dómum.

Var þar af leiðandi ekki talið að maðurinn hefði nafngreint sig og hann því ekki talinn bera refsiábyrgð á efni auglýsinganna. Því var maðurinn sýknaður líkt og í héraðsdómi.