Síminn tapaði 3,6 milljörðum í fyrra

Síminn tapaði tæpum 3,6 milljöðrum króna á síðasta ári samkvæmt ársuppgjör sem birt er á heimasíðu Kauphallar Íslands. Fram kemur að hagnaður á síðari helmingi ársins hafi verið 2,8 milljarðar króna en að slök afkoma skýrist af gengisþróun krónunnar og nam gengistapið um 5,8 milljörðum króna.

Í tilkynningunni er haft eftir Brynjólfi Bjarnasyni, forstjóra Símans, að árið 2006 hafi verið Símanum að mestu hagstætt. „Hins vegar hefur óhagstæð gengisþróun krónunnar töluverð áhrif á rekstrarniðurstöðuna, eins og hjá fleiri innlendum fyrirtækjum," segir Brynjólfur.

Sala Símans á síðasta ári nam rúmum 25 milljörðum og jókst um tæp 16 prósent milli ára.

Þá kemur fram í tilkynningunni að afskriftir félagsins hafi numið rúmum 3,8 milljöðrum í fyrra sem er svipað og árið 2005.

Helstu dótturfélög sem eru innifalin í samstæðureikningi Símans eru: Anza hf., Upplýsingaveitur ehf., Skjárinn miðlar ehf., Tæknivörur ehf. og Sirius IT sem er dótturfélag Anza.