Staðfesti gæsluvarðhald yfir karlmanni í tengslum við umfjöllun Kompáss

Hæstiréttur staðfesti í dag gæsluvarðhaldsúrskurð yfir manni sem gaf sig fram við lögreglu eftir umfjöllun fréttaskýringarþáttarins Kompáss um barnaníðinga. Hann var í hópi fjögurra manna sem komu í íbúð sem þátturinn hafði leigt eftir að mennirnir höfðu sett sig í samband við þrettán ára stúlku í kynferðislegum tilgangi, en stúlkan sem reyndist tálbeita Kompáss.

Lögregla skoðaði tölvu mannsins og fann þar 13 barnaklámmyndir auk þriggja myndbanda sem töldust barnaklám, þar af eitt tvítekið. Telur lögreglustjórinn rökstuddan grun um að maðurinn hafi brotið gegn stúlkunum er sýndar séu á þeim myndbrotum sem lögregla fann í tölvu hans.

Þá vísar lögreglustjórinn til þess að bæði myndbrotin virðist vera tekin á mjög líkan hátt, þ.e. af þeim manni sem hefur kynferðismök við stúlkurnar. Segir lögregla málinu langt í frá lokið og fór því fram á gæsluvarðhald. Fór hún fram á gæsluvarðhald yfir manninum til 16. febrúar en Hæstiréttur staðfesti gæsluvarðahaldsúrskurð héraðsdóms til 13. febrúar.