Kristinn H. Gunnarsson gerist frjálslyndur

Þingmaðurinn Kristinn H. Gunnarsson hefur sagt sig úr Framsóknarflokknum og ætlar hann að ganga til liðs við Frjálslynda flokkinn. Þetta kemur fram í tilkynningu frá honum í dag.

Þar kemur enn fremur fram að viðræður við frjálslynd þar að lútandi verði hafnar á næstu dögum. Kristinn segir Frjálslynda flokkinn með svipaðar áherslur og Framsóknarflokkinn í ýmsum málaflokkum og að Frjálslyndi flokkurinn hafi skapað sér sess sem frjálslyndur og umbótasinnaður flokkur milli hægri og vinstri vængs stjórnmálanna.

Um leið og Kristinn segir sig úr Framsóknarflokknum hefur hann óskað eftir að verða leystur undan trúnaðarstörfum sínum fyrir flokkinn, þar á meðal í þingnefndum, og þá mun hann falast eftir því við heilbrigðisráðherra að verða leystur undan störfum sem formaður stjórnar Tryggingastofnunar ríkisins. Jafnframt hættir hann stuðningi við ríkisstjórnina og skipar sér í hóp stjórnarandstæðinga fram að alþingiskosningum í vor.

Eins og greint hefur verið frá í fréttum laut Kristinn í lægra haldi fyrir Magnúsi Stefánssyni félagsmálaráðherra í baráttu um leiðtogasætið í prófkjöri Framsóknarflokksins í Norðvesturkjördæmi fyrir áramót. Kristinn endaði í þriðja sæti á eftir Herdísi Sæmundardóttur en ákvað að þiggja það ekki heldur róa á önnur mið.