Magn dagblaða og auglýsingapósts eykst um rúm 50 prósent

Ársskammturinn af dagblöðum og auglýsingapósti hefur aukist um rúm 50 prósent frá árinu 2003 samkvæmt tilraun sem tólf heimili í Hlíðunum hafa tekið þátt í. Fram kemur á vef umhverfissviðs Reykjavíkurborgar að árið 2003 bárust 133 kíló af slíkum pósti inn á hvert heimili en árið 2006 var magnið orðið 205 kíló. Í Reykjavík reyndust dagblöð, tímarit og auglýsingapóstur í fyrra vera ríflega fjórðungur af heimilissorpinu.

Þá kemur enn fremur fram á vef umhverfissviðs að Íslendingar nota um fjórar milljónir pítsukassa á ári og ef þeim yrði staflað upp myndu þeir ná 240 kílómetra hæð.

Vikulega fara 12 gámar af pappír, pappírsumbúðum og bylgjupappa til Svíþjóðar til endurvinnslu. Segir umhverfissvið að í fyrra hafi Sorpa sent 8.400 tonn af dagblöðum og tímaritapappír til Svíþjóðar sem eigi að duga til að framleiða 36 milljónir af klósettrúllum.