Skólagjöld hækkuð í HR í haust

Skólagjöld í Háskólanum í Reykjavík verða hækkuð umfram launga- og neysluvísitölu í haust vegna ýmiss kostnaðar eins og það er orðað í bréfi rektors til nemenda. Þar er tekið sem dæmi að skólagjöld í grunnámi muni hækka úr 110 þúsund krónum á önn í 128 þúsund fyrir komandi haustönn.

Enn fremur segir í bréfinu að kostnaðurinn sé tilkominn vegna aukins fjölda valnámskeiða, aukins húsnæðiskostnaðar og 50 milljóna króna fasteignagjalda sem nú falli á skólann í fyrsta sinn vegna breytinga á innheimtu slíkra gjalda.

Þá segir rektor jafnframt að stjórnendur skólans hafi leitast við að hagræða í rekstri eins og kostur er til þess að lágmarka hækkun skólagjaldanna. Að ósk formanna nemendafélaga í skólanum muni skólinn nú móta í samvinnu við nemendur vinnufyrirkomulag og reglur um upplýsingagjöf til nemenda um skólagjöld og mögulega þróun þeirra meðan á námstíma stendur strax við upphaf náms.