Viðskiptablaðið kemur út fimm sinnum í viku

Þriðja íslenska dagblaðið kom út í morgun. Kunnuglegt að vísu og heitir Viðskiptablaðið sem frá og með deginum í dag kemur út fimm sinnum í viku. Hið laxableika viðskiptablað sem kom fyrst út fyrir þrettán árum mun frá og með deginum í dag koma út frá þriðjudegi til laugardags.

Starfsmenn og velunnarar fögnuðu þessum tímamótum yfir morgunverði á Hótel Borg í morgun þar sem ritstjórinn Óli Björn Kárason afhenti Höllu Tómasdóttur, framkvæmdastjóra Viðskiptaráðs, fyrsta eintakið. Hún fagnaði þessu framtaki, sagði hugmyndina dálítið klikkaða en myndi áreiðanlega virka. Óli Björn er sannfærður um að markaður sé á Íslandi fyrir dagblað um viðskipti.