Geta treyst hlutleysi Capacent Gallup

Íbúar í Hafnarfirði geta treyst því að kynningarefni sem komi frá bænum, vegna stækkunar álversins í Straumsvík, verði sett fram með hlutlausum hætti. Þetta segir í tilkynningu sem upplýsinga- og kynningarfulltrúi Hafnarfjarðar hefur sent frá sér.

Samtökin Sól í Straumi hafa gagnrýnt að fyrirtækið Capacent Gallup sjái um kynningu fyrir bæinn, vegna stækkunarinnar, þar sem Capacent Gallup hefur unnið með Alcan í málinu. Í tilkynningunni segir að bærinn hafi góða reynslu af því að vinna með fyrirtækinu og trúi því að það komi til með að starfa að heilindum og heiðarleika við kynninguna.