Búist við átökum á fundi Framtíðarlandsins

Búist er við miklum átökum á fundi Framtíðarlandsins í kvöld þar sem ákveðið verður hvort ráðist verður í framboð fyrir alþingiskosningar. Fundurinn verður á Hótel Loftleiðum í kvöld klukkan átta og fyrir liggur tillaga stjórnar um að bjóða fram í alþingiskosningum undir merkjum Framtíðarlandsins. Drög að stefnuáætlun verða lögð fyrir fundinn.

Krafist er aukins meirihluta fyrir tillögunni, það er, tveir þriðju þurfa að samþykkja framboð. Atkvæðisrétt hafa þeir sem voru skráðir félagar fyrir hádegi á mánudag. Verði tillagan samþykkt skipar stjórnin uppstillingarnefnd og ábyrgist að stefnuskjali verði fylgt eftir. Verði tillagan felld, verður rætt um áherslur í áframhaldandi starfi félagsins.