Samfylkingin hvergi bangin

Varaformaður Samfylkingarinnar segir að nægur tími sé til að hífa upp fylgi flokksins fyrir kosningar og að formaður flokksins sé trompið í þeirri viðleitni.

Helstu niðurstöður skoðanakannannar Blaðsins um fylgi stjórnmálaflokkana sem birt var í dag sýnir mikið fylgistap hjá Samfylkingunni frá síðustu kosningum og mælist hún nú með liðlega 19 prósenta fylgi en var með 31 prósent í kosningum 2003.

Fylgi hrynur líka af Frjálslynda flokknum sem fengi rúm þrjú prósent en flokkurinn hefur mælst með um 9 til 12 prósenta fylgi síðan í nóvember og flokkurinn myndi tæpast fá mann í næstu kosningum ef fram heldur. Svo virðist sem fylgi frá Samfylkingunni og Frjálslyndum fari yfir á Sjálfstæðisflokkinn sem mælist með rúm 45 prósent og á Vinstri græna sem mælast með tæplega 23 prósenta fylgi.

Framsóknarflokkurinn fengi um níu og hálft prósent samkvæmt könnunni en 750 einstaklingar voru í úrtakinu og þar af tóku 53 prósent af stöðu. 39 prósent voru óákveðnir.

Varaformaður Samfylkingarinnar er hvergi banginn þrátt fyrir fylgishrun flokksins. „Aðilatriðið er að baráttumál okkar liggja fyrir og þau eru rétt að okkar mati. Við erum að berjast gegn okrinu og fyrir velferð eldri einstaklinga í landinu. Á meðan svo er þá þurfum við bara að spýta í lófana. Ég er bjartsýnn á að við náum að hífa þetta fylgi upp. Það er engin ástæða til að örvænta. Það er nægur tími. Hugmyndafræði jafnaðarmanna á erindi við Íslendinga," segir Ágúst Ólafur Ágústsson varaformaður Samfylkingarinnar.

Aðspurður um stöðu Ingibjargar Sólrúnar Gísladóttur formanns Samfylkingarinnar segir Ágúst: „Mér finnst formaður Samfylkingarinnar hafa staðið sig afskaplega vel".