Segja stjórnarliða í leikritagerð

Stjórnarandstaðan sagði Sigurð Kára Kristjánsson, þingmann Sjálfstæðisflokksins, og forsætisráðherra hafa sett á svið leikrit í fyrirspurnatíma á Alþingi í dag, þar sem þingmaðurinn vakti athygli á nýrri skýrslu um tekjuskiptingu á Íslandi. Sigurður Kári sagði stjórnarandstöðuna ekki þola upplýsingar um góða stöðu mála í landinu.

Þingmaðurinn spurði forsætisráðherra út í nýlega skýrslu Hagstofu Íslands sem sýndi að tekjuskiptin á Íslandi væri minni en víðast hvar annars staðar í Evrópu. Þar væri byggt á evrópskum stöðlum og skýrslan hluti af lífskjararannsókn Evrópusambandsins.

"Ísland er með öðrum orðum í fremstu röð á þessu sviði," sagði Sigurður Kári. Þessar niðurstöður væru stórmerkilegar ekki hvað síst þegar litið væri til þess að þær byggðu á samræmdri aðferðafræði Evrópusambandsins.

Forsætisráðherra sagði eitt af því sem skoðað væri, væru lágtekjumörk, en þeir sem lentu undir þeim ættu á hættu að lenda í fátækt.

Þessi lágtekjumörk sýna það að 9,7 prósent eru fyrir neðan þessi mörk. Aðeins eitt ríki í Evrópu stendur betur hvað þetta varðar og það er Svíþjóð," sagði Geir H Haarde.

Sigurður Kári sagðist geta tekið undir með forsætisráðherra og mikilvægt væri að heyra viðbrögð hans við svona merkilegum niðurstöðum. Því sannarlega væru þær stórmerkilegar.

Mörður Árnason þingmaður Samfylkingarinnar sagði að þingmanninn og forsætisráðherra hafa sett á svið leikrit á Alþingi sem ætti ekki heima í fyrirspurnartíma.

"Þar sem orðsvörin voru svo vandlega undirbúin að að jafnvel fremstu leikstjórar á Alþingi geta verið stoltir af," sagði Mörður.

Arnbjör Sveinsdóttir þingflokksformaður Sjálfstæðismanna sagði að þingmenn ættu ekki að gera lítið úr sjálfum sér með því að kalla störf og umræður á þinginu leikrit.

"Ég held að ég og þingflokksformaður Sjálfstæðismanna getum þó verið sammála um það að hann lék þetta mjög vekl," sagði Össur Skarphéðinsson.