Aldraðir óánægðir með að ráðherra styðji þá með þeirra eigin fé

Stjórn Landssambands eldri borgara lýsir yfir undrun og óánægju með að stjórnvöld hafi stutt blaðaútgáfu sambandsins með fjármagni úr Framkvæmdarsjóði aldraðra. "Stormur í vatnsglasi" segir heilbrigðisráðherra.

Eins og fram hefur komið í fréttum Stöðvar 2 hefur heilbrigðisráðherra verið sakaður um að dreifa kosningabæklingi með útgáfu félagsblaði Landssambands eldri borgara en í bæklingnum er sýn ráðherrans í öldrunarmálum kynnt. Ráðherrann styrkti blaðaútgáfuna um rúmlega eina milljón og þrjúhundruð þúsund krónur og fékk að láta bæklingin fylgja með. Framkvæmdarstjórn Landssambandsins fundaði í dag um málið og ályktaði um málið. Þar lýsir Landssambandið því yfir að ekkert óeðlilegt sé að stjórnvöld styðji við bakið á vegna blaðaútgáfunnar og að bæklingurinn fylgdi með, en hins vegar séu mikil vonbrigði hvaðan féð komi eða úr þeirra eigin sjóði. Aðspurður um hvort stjórn Landssambandsins hafi vitað að fjármagnið kæmi úr Framkvæmdarsjóði aldraðra segir Borgþór að stjórnin hafi ekki vitað það og gert ráð fyrir að greitt yrði fyrir þetta úr öðru rekstarfé ráðuneytisins.

Framkvæmdastjórnin lýsir megnri óánægju með, að sjóðurinn skuli ekki hafa brugðist nægilega hratt við brýnasta verkefninu, sem er uppbygging hjúkrunarrýma, og er mest aðkallandi í málefnum aldraðra og aðstandenda. Í utandagskrárumræðum á Alþingi í dag var málið rætt. Þar sagði Siv Friðleifsdóttir, heilbrigðisráðhera, að málið væri stormur í vatnsglasi og að upplýsingar til hóps aldraðra væri nauðsynlegur þáttur.