Bílaflotinn allur á vetni innan 30 ára

Vetnisverkefnið með Strætó sýnir að hægt hefði verið að minnka losun á koltvísýringi í andrúmsloftið um 20 þúsund tonn á síðustu tveimur árum ef allir strætisvagnar hefðu gengið fyrir vetni. Í morgun voru kynntar tillögur um breytingar á gjaldtöku á bifreiðar sem tekur mið af losun þeirra á koltvísýringi og líst iðnaðarráðherra vel á tillögurnar.

Niðurstöður af vetnisverkefninu með strætó voru kynntar í morgun. Þar kemur í ljós að akstur þriggja strætisvagna á vetni, sparaði brennslu á 70 þúsund lítrum af díselolíu sem þannig kom í veg fyrir útblástur á 200 tonnum af koltvíssýringi. Ef þetta yrði fært yfir á allan strætóflota landsmanna hefði verið hægt að minnka útblástur koltvísýrings um 20 þúsund tonn. Þessu verkefni er lokið, en framundan er framhald á verkefninu með allt að 30 einkabílum.

"Og þegar við tölum um fjöldaframleiðslu þá erum við að tala um bíla sem hafa sama drægi, öll sömu þægindi og sama kostnað í framleiðslu og kaupum fyrir neytandann, segir Jón Björn Skúlason framkvæmdastjóri Nýorku. Öðruvísi fari þeir ekki í fjöldaframleiðslu. Þannig að eftir 20 - 30 ár gæti allur íslenski flotinn verið drifinn af vetni og þá verði að vera búið að byggja upp innviði og annað slíkt fyrir það kerfi.

Það er eftir miklu að slægjast í þessum efnum því árlega spúir umferð á landi um 700 þúsund tonnum að gróðurhúsalofttegundum út í loftið.

Þá kynnti starfshópur á vegum ríkisstjórnarinnar fyrstu niðurstöður sínar varðandi vettvang um vistvænt eldsneyti. Þar er miðað við að gjaldtöku af bifreiðum verði breytt þannig að hún miðist við útblástur þeirra á gróðurhúsaloftegundum, þannig að bílar sem skila engum slíkum loftegundum, beri engin gjöld önnur en innflutningsgjöld. Jón Sigurðsson iðnaðarráðherra segir að nokkur ráðuneyti verði að bera saman bækur sínar í þessum efnum.

"En þetta eru mjög athygliverðar tillögur og þær eru í samræmi við það sem er að gerast mjög víða, að nota hagræna hvata, nota hvata til að örva það til að menn breyti orkunýtingunni og það er sjálfsagt að taka það til mjög alvarlegrar skoðunar og ég fagna þessum tillögum og get lýst mig almennt séð hlyntan þeim," sagði iðnaðarráðherra.