Tekist á um ábyrgð í Byrgismálinu

Forsætisráðherra telur ekki að Magnús Stefánsson félagsmálaráðherra eigi að segja af sér vegna Byrgismálsins. Valdimar Leó Friðriksson, þingmaður Frjálslynda flokksins, spurði á Alþingi í dag hver bæri ábyrgð í málinu og velti því upp hvort að forsætisráðherra eða félagsmálaráðherra hefðu átt að segja af sér vegna málsins.

Valdimar spurði fyrst hvort að forsætisráðherra teldi að núverandi félagsmálaráðherra ætti að segja af sér. Geir H. Haarde forsætisráðherra sagði Magnús hafa beitt sér fyrir því að farið yrði yfir málið þegar kom í ljós hvað var í gangi. Geir sagði þingmenn stjórnarandstöðunnar nær að hugsa um hverjir hafi beitt sér fyrir því að peningar færu í Byrgið. Valdimar sagði hins vegar sannleikanum um stöðu mála hafa verið leynt fyrir þingmönnum og þeirra afstaða mótast af því.

Valdimar Leó vísaði svo í ráðherralög og velti því upp hvort að forsætisráðherra ætti að segja af sér vegna málsins. Geir sagði túlkun hans á lögunum nýstárlega og vildi ekki hafa fleiri orð málið.