Vill skjóta afgreiðslu samningsins

Guðni Ágústsson, landbúnaðarráðherra, átti fundi með tveimur af framkvæmdarstjórum Evrópusambandsins og ræddi meðal annars samning um gagnkvæman markaðsaðgang fyrir landbúnaðarvörur.

Í tilkynningu frá landbúnaðarráðuneytinu segir að Guðni hafi átt fundi með þeim Mariann Fischer Boel, framkvæmdarstjóra ESB um landbúnaðar og byggðarmál, og Markos Kyprianou, framkvæmdarstjóra ESB um heilbrigðismál og neytendavernd. Fundirnir fóru fram í Brussel í Belgíu dagana 1. og 2. febrúar.

Á fundinum með Boel var rætt um samning milli Íslands og ESB um gagnkvæman markaðsaðgang fyrir landbúnaðarvörur. Samningurinn er liður í aðgerðum ríkistjórnarinnar til lækkunar matvælaverðs.

Ísland veitir ríkjum ESB tollkvóta án aðflutningsgjalda fyrir kjöt, kjötvörur, kartöflur, rjúpur og osta. ESB veitir Íslandi tollkvóta án aðflutningsgjalda fyrir lambakjöt, skyr, smjör og pylsur frá Íslandi. Guðni lagði áherslu á skjóta afgreiðslu samningsins sem tekur gildi hérlendis 1. mars.

Á fundinum með Kyprianou var rætt um væntanlega innleiðingu Íslands á matvælalöggjöf ESB og upptöku heilbrigðisreglna í landbúnaði. Landbúnaðarráðherra gagnrýndi bann ESB við notkun á fiskimjöli í fóður jórturdýra.

Í för sinni hitti ráðherrann einnig fulltrúa frá Fríverslunarsamtökum Evrópu (EVTA) og Eftirlitsstofnun EFTA (ESA).