Frönsk útvarpsstöð á Íslandi

Franska útvarpsrásin Radio France Internationale hóf útsendingar á Íslandi um helgina. Stöðinni er útvarpað allan sólarhringinn, alla daga vikunnar á tíðninni FM 89,0.

Útsendingin nær til höfuðborgarsvæðisins en samið hefur verið um hana til eins árs. Upphaf útsendinganna er í tengslum við frönsku menningarhátíðina „Pourquoi-Pas? Franskt vor á Íslandi" sem hefst 22. febrúar.

Radio France Internationale er frönsk opinber útvarpsrás sem rekin er af utanríkisráðuneyti Frakklands. Fjöldi hlustenda er 44 milljónir, þar af 25 milljónir í Afríku. Í Evrópu er fjöldi hlustenda um 2 milljónir. Rásin er með 150 senda víða um heim en fluttar eru fréttir á hálftíma fresti.