Nýtt pólitískt afl á hægri vængnum í burðarliðnum

Nýtt afl er að koma fram á sjónarsviðið í íslenskum stjórnmálum eftir því sem segir á bloggsíðu Margrétar Sverrisdóttur. Þar segir Margrét að fundað hafi verið í gær og að á næstunni verði sett fram skýr markmið framboðs sem sé hægra megin við miðju í pólitísku litrófi stjórnmálanna.

Eins og kunnugt er sagði Margrét sig úr Frjálslynda flokknum á mánudaginn eftir að hún laut í lægra haldi fyrir Magnúsi Þór Hafsteinssyni í varaformannskjöri á landsfundi flokksins um síðustu helgi. Margrét sagði á mánudag að hún myndi nota næstu tvær vikur til að ákveða pólitíska framtíð sína.

Samkvæmt heimildum fréttastofu er ekki um samstarf við Framtíðarlandið að ræða. Margrét segir að hópur stuðningsmanna hennar ætli að halda sínu striki en útilokar ekki samstarf við aðra í svipuðum hugleiðingum á síðari stigum.