Karíus og Baktus mæta í Borgarleikhúsið

Sýningar á hinu sívinsæla verki um Karíus og Baktus, sem Leikfélag Akureyrar hefur sett upp, hefjast í Borgarleikhúsinu í dag. Samkvæmt tilkynningu frá Leikfélagi Akureyrar er gríðarlegur áhugi fyrir sýningunni og er þegar uppselt á allar sýningar í febrúar og mars. Vegna þess hefur aukasýningum verið bætt við í apríl en þær munu einnig vera óðum að fyllast. Það eru þeir Ólafur Steinn Ingunnarson og Guðjón Davíð Karlsson sem leika tannálfana skeinuhættu en á fimmta þúsund manns sá sýninguna á Akureyri fyrir áramót.