Fjölgaði um 80 prósent í strætó þegar gjaldtöku var hætt

Farþegum með almenningsvögnum í Reykjanesbæ fjölgaði um áttatíu prósent þegar gjaldtöku var hætt í vögnunum. Árni Sigfússon bæjarstjóri telur að reynslan af ókeypis strætó sé afar jákvæð.

Á grundvelli umhverfissjónarmiða hafa menn beint sjónum sínum að almenningssamgöngum og velt þeim kosti upp hvort ekki sé rétt að hafa strætisvagna ókeypis til að fjölga farþegum og minnka mengun, til dæmis vegna útblásturs og svifryks.

Akureyringar hafa nýverið lagt af gjaldtöku í strætó og fyrstu tölur benda til 60 prósent aukningar. Í Reykjanesbæ hefur þetta verið við lýði í fjögur ár og skilað ótvíræðum árangri.

Árni Sigfússon bæjarstjóri segir að notendafjöldi hafi aukist um áttatíu prósent fyrsta árið og haldist stöðugur síðan. Rekstur vagnanna kostar Reykjanesbæ 55 milljónir á ári. Árni bendir á aukna notkun meðal barna og unglinga - dregið hafi úr skutli foreldra með börn. Fullyrða megi að í Reykjanesbæ sé að vaxa upp kynslóð sem nýtir almenningsvagna.

Það hefur verið rætt innan stjórnar Strætós á höfuðborgarsvæði að fara þessa leið. Fargjöld skila í dag um 700 miljónum á ári af heildarrekstrarkostnaði sem nemur 2,2 milljörðum króna.

Ármann Ólafsson, stjórnarformaður Strætós, telur spennandi að skoða hvort ókeypis strætó geti leitt til farþegaaukningar, en benti einnig á í viðtali við Stöð 2 að fjölgun sérstakra akstursreina fyrir almenningsvagna væri vænleg leið til að fjölga notendum.