Fundu 30 þúsund steratöflur í gær

Lögreglan á höfuðborgarsvæðinu lagði í gærdag hald á um 30 þúsund steratöflur á nokkrum stöðum í borginni. Maður á fimmtugsaldri var handtekinn í tengslum við málið en hluti taflnanna fannst á heimili hans. Að sögn Ásgeirs Karlssonar, yfirmanns fíkniefnadeildar lögreglunnar, er þetta líklega mesta magn sterataflna sem hald hefur lagt á hér á landi.

Maðurinn sem gripinn var í gær var yfirheyrður og svo sleppt þar sem ekki þótti ástæða til að halda honum. Ásgeir segir að það liggi ekki fyrir hvort fleiri hafi verið tengdir málinu en töflunar hafi líklega verið ætlaðar til sölu hér á landi.

Um tvær vikur eru síðan tollverðir í Reykjavík fundu þrettán þúsund ólöglegar steratöflur í vörusendingu til fyrirtækis í Keflavík. Þær voru faldar innan um annan varning á vörubretti.