Athugar hvort minnka þurfi sandburð vegna svifryks

Formaður framkvæmdaráðs á Akureyri segir til skoðunar að minnka sandburð í hálku en vill ekki skipta sandinum út fyrir salt. Bærinn þarf að finna leiðir til að minnka svifryksmengun.

Í fyrradag var greint frá skýrslu um stöðu svifryksmengunar á höfuðborgarsvæðinu og tillögur starfshóps umhverfisráðuneytisins kynntar. Einnig var kynnt akureyrsk rannsókn sem Kristín Sigfúsdóttir umhverfisfræðingur hefur unnið að ásamt fleirum.

Þar kom fram að svifryk fór fleiri daga yfir heilsuverndarmörk á ári í fyrra á Akureyri en í Reykjavík og eru nú leiðir til skoðunar til að minnka svifrykið. 55 prósent svifryks koma frá malbiki og 25 prósent frá jarðvegi í Reykjavík.

Á Akureyri er hins vegar sandborið en ekki saltað þegar hált er og segir formaður framkvæmdaráðs bæjarins að þau mál séu til skoðunar eins og önnur.