Rannsóknaðferðir eins og í lögregluríkjum

Félag íslenskra stórkaupmanna mótmælir því harðlega að Samkeppnieftirlitið hvetji starfsfólk fyrirtækja sem vinni við framleiðslu, dreifingu og sölu á matvörum til að tilkynna um hugsanleg brot á samkeppnislögum og segir slíkar rannsóknaraðferðir aðeins tíðkast í lögregluríkjum.

Í yfirlýsingu frá félaginu segir enn fremur að það leggi mikla áherslu á virkt samkeppniseftirlit en engu að síður verði rannsóknir samkeppnisyfirvalda að gæta meðalhófs. Þær megi ekki íþyngja einstaklingum eða fyrirtækjum meira en nauðsynlegt þyki en það hafi Samkeppniseftirlitið gert í gær með yfirlýsingum sínum þar sem fólk sem starfi við framleiðslu, dreifingu eða sölu á matvörum sé hvatt til að senda eftirlitinu ábendingar um hugsanleg brot á samkeppnislögum.

Neytendastofa telur nauðsynlegt að virkja almenning til eftirlits með verði á vörum og þjónustu í framhaldi af ákvörðun ríkisstjórnarinnar um lækkun á virðisaukaskatti af matvælum og þjónustu veitinga- og gistihúsa frá og með 1. mars.

Hún hefur sent frá sér hvatningu til allra neytenda í landinu í gær þar sem þeir eru beðnir að taka virkan þátt í aðhaldi og eftirliti með því að verðlagsbreytingar skili sér til neytenda.  Á heimsíðu Neytendastofu hefur af þessu tilefni verið opnuð vefgátt undir nafninu: „Verðlagsábendingar – Láttu vita!“ Þar geta neytendur komið á framfæri ábendingum, nafnlaust, eða undir nafni, um það hvort fyrirhugaðar verðlagsbreytingar komi til framkvæmda hjá þeim aðilum sem þeir eiga viðskipti við. Neytendastofa mun vinna úr upplýsingunum.