Fangaverðir ósáttir við þvinganir

Fangaverðir eru ósáttir við að þvinga eigi þá til að vinna hálfu ári lengur en venjubundinn uppsagnarfrestur gerir ráð fyrir. Um helmingur fangavarða hefur sagt upp stöfum og hyggst Fangelsismálastofnun nýta sér lagaheimild til að lengja uppsagnarfrest þeirra haldi þeir uppsögnum sínum til streitu.

Fangaverðir eru óánægðir með laun sín og segja að þau séu um þrjátíu prósent lægri en laun lögreglumanna sem er viðmiðunarstétt fangavarða. Þeir vilja að stofnanasamningur sem í gildi er verði tekinn upp og laun þeirra endurskoðuð. Fangaverðir funduðu um málið með Birni Bjarnasyni, dómsmálaráðherra, í desember og með Árna M. Mathiesen, fjármálaráðherra, í síðustu viku. Ekkert hefur hins vegar gerst og þeim brast því geð á mánudaginn og sendu inn uppsagnarbréf. Sigurjón Birgisson, formaður Félags fangavarða, segir fangaverði furða sig á því að Fangelsismálastofnun ætli að fara þá leið að þvinga óánægt starfsfólk til vinnu. Eðlilegast væri að setja niður og ræða málin enda snúist þetta ekki aðeins um laun heldur þurfi að skoða fangelsinskerfið í heild. Kerfið standi og falli með ánægðu stafsfólki.