Stjórnarandstaðan að springa á biðinni

Samgönguráðherra vildi ekki upplýsa það á Alþingi í morgun hvenær von væri á samgönguáætlun til umræðna á þinginu. Mikill hiti var í umræðunni og snupraði forseti þingsins einn þingmann fyrir brot á þingsköpum í ræðu sinni.

Samgönguáætlun er ítarlegt þingskjal þar sem kveðið er á um framkvæmdir í vegagerð, flugmálum og málefnum siglinga. Stjórnarandstöðuþingmenn eru orðnir langeygir eftir áætluninni, enda má reikna með að í henni sé mikið pólitískt púður fyrir kosningabaráttuna í vor en samgönguáætlunin er nú til meðferðar í þingflokkum stjórnarflokkanna.

Björgvin G Sigurðsson, þingmaður Samfylkingarinnar, í Suðurkjördæmi vildi að samgönguráðherra svaraði því hvort til stæði að bæta Suðurlandsveg með svokallaðri 2+1 leið eða 2+2 leið.

Björgvin sagði misvísandi fréttir berast innan úr stjórnarflokkunum um það hvor leiðin verði farin varðandi Suðurlandsveg. Beitt væri brellum til að láta líta út fyrir að tvöfalda ætti veginn en það ætti að gerast á tíu árum.

Valdimar Leó Friðrikssyni, þingmanni Frjálslynda flokksins, var heitt í hamsi í umræðunni. Sigurður Kári Kristjánsson, þingmaður Sjálfstæðisflokksins, greip fram í fyrir Valdimar í ræðustóli og spurði þingmanninn hvenær hann hefði fengið áhuga á Suðurlandsvegi. Þá spurði Valdimar Sigurð hvort hann gerði sér ekki grein fyrir því að Suðurlandsvegur væri dauðagildra og spurði svo hvort hann væri ekki kominn með bílprófið aftur.

Sigríður Anna Þórðardóttir forseti Alþingis sá ástæðu til að snupra Valdimar fyrir þessi ummæli og benti honum á að þingmenn ættu ekki að ávarpa hver annan í annarri persónu úr ræðustóli Alþingis og þeir ættu heldur ekki að eiga í samræðum úr ræðustóli.

Sturla Böðvarsson samgönguráðherra gaf engin svör um það hvenær mætti eiga von á að stjórnarflokkarnir lykju umræðum sínum um samgönguáætlunina þannig að þingheimur fengi að líta hana augum. Hann minnti á að samgönguáætlun fjallaði ekki eingöngu um vegamál heldur einnig flugmál, flugöruggismál og málefni siglinga.