Kostnaður vegna Wilson Muuga þegar orðinn nærri 50 milljónir

Kostnaður Umhverfisstofnunar vegna strands flutningaskipsins Wilson Muuga er nú þegar kominn í tæpar 48 milljónir króna en útgerð og tryggingafélag skipsins hafa lýst því yfir að þau muni ekki greiða meira en rúmar 70 milljónir króna fyrir hreinsun á strandstað.

Kostnaður Umhverfisstofnunar er vegna eftirlits vegna bráðamengunar og aðgerða til að koma í veg fyrir viðlíka mengun á strandstað í Hvalsnesfjöru, þar sem skipið strandaði hinn 19. desember. Uppgefinn kostnaður stofnunarinnar er 45,5 milljónir en enn á eftir að berast reikningur frá undirverktaka stofnunarinnar upp á um tvær milljónir króna.

Umhverfisráðherra sagði á Alþingi í gær að skipafélagið hefði frest til 19. júní til að koma flakinu af strandstað og hreinsa upp eftir það.