Ófremdarástand í fangelsismálum á Akureyri

Flótti gæsluvarðhaldsfanga úr fangelsinu á Akureyri í gærkvöldi er dæmi um það ófremdarástand sem ríkir í fangelsismálum á Akureyri. Þetta segir Fangelsismálastofnun, en einum fanganna tókst að komast út úr klefa sínum og frelsa tvo aðra.

Mannleg mistök urðu til þess að þrjú ungmenni struku úr gæsluvarðhaldi lögreglu á Akureyri í gærkvöld. Guðmundur Gíslason hjá Fangelsismálastofnun segir að einn fangavörður hafi verið á vakt með tíu fanga alls í sinni umsjá. Þar af sjö afplánunarfanga. Það sé litið alvarlegum augum að einum gæsluvarðhaldsfanganna hafi tekist að opna sína klefahurð, en klefadyrum í kjallara er ekki læst með lykli heldur notaðar rennilokur og svo hleypti hann tveimur öðrum út þannig að þrír struku. Ungmennin stálu bíl og voru komin langleiðina til Varmahlíðar þegar þau náðust og dúsa nú aftur í fangaklefum á Akureyri.

Fangelsismálastofnun segir að búnaður fangelsisins á Akureyri sé ekki nægilega góður og þetta kalli á breytt vinnubrögð og verklag. Engin hemja sé heldur hve lengi það hafi dregist að endurbyggja fangelsið, segir Guðmundur sem sér um fangamál á Akureyri.