Um helmingur fangavarða í landinu hefur sagt upp

Rétt um helmingur allra fangavarða í landinu hefur skilað inn uppsagnarbréfi til Fangelsismálastofnunar vegna mikillar ónægju með kjör sín. Fangaverðir eru ósáttir við að þeir hafi dregist aftur úr lögreglumönnum í launum en laun þessara tveggja stétta héldust lengi vel í hendur.

Fara fangaverðir fram á 30 prósenta launahækkun til þess að brúa bilið en að sögn þeirra hefur gengið illa að manna stöður vegna þessa. Alls eru 82 fangaverðir starfandi í fimm fangelsum í landinu, langflestir á Litla-Hrauni, en einnig á Kvíabryggju, Akureyri, í Kópavogi og Hegningarhúsinu við Skólavörðustíg. Að sögn Hólmfríðar Árnadóttur, starfsmannastjóra hjá Fangelsismálastofnun, höfðu um 40 uppsagnarbréf borist í gær og átti hún von á fleirum í dag.

Fangavörðum er óheimilt samkvæmt lögum að fara í verkfall og því er uppsögn eina úrræði þeirra. Þær upplýsingar fengust hjá SFR, sem fer með samningsumboð fyrir fangaverði, að engar formlegar viðræður væru við stjórnvöld um málið en ráðamenn hefðu verið upplýstir um í hvað stefndi áður en það kom til uppsagna.