Stærsta farþegaþota heims aftur á Íslandi

Hin glænýja risaþota Airbus A380 kom til Íslands í dag í annað sinn á skömmum tíma til að prófa hvernig þessi stærsta farþegaþota heims reynist í erfiðum hliðarvindslendingum. Tekið var á loft og vélinni lent nokkrum sinnum og tók æfingin alls um eina og hálfa klukkustund.

Vélinni, sem er á vegum Airbus-flugvélaverksmiðjunnar, hefur áður verið flogið hingað til lands í sama tilgangi því í nóvember sl. var hún prófuð hér í miklum hliðarvindi. Vélin er mikil smíði, 560 tonn með vænghaf uppá 80 metra og rúmar 850 farþega á tveimur hæðum. Áætlað er að vélin verði tekin í notkun í almennu flugi næsta haust.