Nemendur sendir heim í mótmælaskyni

Kennarar í barnaskólanum á Eyrarbakka sendu í morgun um áttatíu börn í efstu bekkjum skólans heim til sín um tíuleytið til þess að mótmæla því sem þeir kalla sleifarlag við framkvæmdir á skólalóðinni á Eyrarbakka.

Um var að ræða alla nemendur í 6.-10. bekk en yngri börnin eru í skóla á Stokkseyri. Að sögn Kristins M. Bárðarsonar, varatrúnaðarmanns kennara og fulltrúa kennara í skólanefnd, eru kennarar orðnir þreyttir á því ástandi sem skólalóðin er í en þar var nýverið bætt við tveimur útistofum með tilheyrandi raski á skólalóðinni.

Kristinn segir að framkvæmdum hafi átt að ljúka um áramót en þeim sé ekki enn lokið. Skólastjórinn hafi margbeðið um úrbætur en talað fyrir daufum eyrum hjá framkvæmda- og veitusviði Árborgar. Bæði nemendum og kennurum sé sýnd lítilsvirðing með þessu vinnubrögðum og að slysahætta hafi verið á skólalóðinni vegna þessa.

Kristinn segir ákvörðunina um að senda börnin heim hafa verið mjög erfiða en að skólastjóra hafi verið tilkynnt um þetta í hádeginu á föstudaginn.

Kristinn segir að bæjarstjóri Árborgar, Ragnheiður Hergeirsdóttir, hafi heimsótt skólann í síðustu viku og verið öll að vilja gerð. Starfsmenn séu þakklátir fyrir heimsókn bæjarstjóra en svo virðist sem einhver tregða sé annars staðar í kerfinu. Aðspurður hvort ætlunin sé að grípa aftur til aðgerða sem þessara segir Kristinn að framkvæmdaaðilum á vegum Árborgar verði gefið nú tækifæri til að sýna vilja í verki.

Ekki hefur náðst í forsvarsmenn framkvæmda- og áveitusviðs Árborgar og heldur ekki Ragnheiði Hergeirsdóttur, bæjarstjóra í Árborg.