Eiður skorar til stuðnings veikum börnum

Eiður Smári Guðjohnsen, fyrirliði íslenska landsliðisins í knattspyrnu og leikmaður Barcelona, skrifaði í gær undir samstarfssamning við Eimskipafélag Íslands til þriggja ára sem færir félaginu heimild til að nota nafn og ímynd Eiðs Smára til kynningar á fyrirtækinu, bæði í auglýsingum og kynningum.

Samstarfið er einnig á sviði góðgerðamála og eftir því sem fram kemur í tilkynningu frá Eimskip ætlar félagið að greiða hálfa milljón króna til Neistans, styrktarfélags hjartveikra barna, fyrir hvert mark sem Eiður Smári skorar í spænsku deildarkeppninni og þá greiðir félagið Umhyggju, félagi langveikra barna, eina milljón króna fyrir hvert mark sem landsliðsfyrirliðinni skorar í Meistaradeild Evrópu.