Dagur Kári hlýtur verðlaun á Sundance

Dagur Kári Gunnarsson kvikmyndaleikstjóri var einn fjögurra hugsjónamanna í kvikmyndagerð sem hlutu verðlaun á Sundance kvikmyndahátíðinni á laugardag. Verðlaunin nema tæplega 700 þúsund krónum í framleiðslustyrk, auk aðstoðar við dreifingu. Það var handrit Dags Kára "The good heart" sem tryggði honum verðlaunin. Auk peningaverðlaunanna eru myndinni tryggðar sýningar í japönsku sjónvarpi.

Sundance/NHK alþjóðlegu kvikmynda verðlaunin eru nú veitt í 11 sinn og hljóta fjórir aðilar frá jafnmörgum svæðum heimsins heiðurinn ár hvert.

Þeir sem hlutu verðlaunin auk Dags Kára eru Lucia Cedron frá Argentínu fyrir "Agnus Dei," Caran Hartsfield frá Bandaríkjunum fyrir "Bury Me Standing," og Tokomo Kana frá Japan fyrir "Two by the River."

Hver sigurvegari var valinn úr hópi 12 aðila sem komust í úrslit og mun starfsfólk hátíðarinnar aðstoða þá við fjármögnun og dreyfingu. Myndirnar verða auk þess sýndar á vegum NHK sjónvarpsfyrirtækisins sem hefur yfir að ráða fimm 24 tíma sjónvarpsstöðvum.