Blatter varpaði sprengju á UEFA þinginu

Sepp Blatter, forseti FIFA, náði að hleypa lífi í síðari daginn á ársþingi UEFA þegar hann lýsti yfir stuðningi við Michel Platini yfir Lennart Johansson sitjandi forseta - aðeins innan við tveimur sólarhringum fyrir forsetakosningarnar. Blatter á að heita hlutlaus í þessu sambandi, en ekki tóku allir jafn vel í uppátæki hans.

"Þetta hefur ekkert með hæfi Johansson að gera, ég er aðeins að lýsa yfir stuðningi við mann sem hefur starfað með mér í mörg ár," sagði Blatter um Platini, sem sækist eftir að hirða forsetaembættið af Johansson sem hefur setið í stólnum síðan árið 1990.

Johansson var skiljanlega hissa á þessu uppátæki Blatter. "Ég á erfitt með að skilja hvað fólst í orðum Blatter, því hann hafði áður hvatt mig til að halda áfram störfum - en lýsir svo yfir stuðningi við hinn aðilann. Ég held að hann hafi bara verið að reyna að snúa sig út úr því sem hann sagði," sagði hinn sænski Johansson.

"Ef Johansson er í uppnámi yfir því sem ég sagði, ætti hann að hafa í huga að þegar ég tók þátt í kosningunum til forseta FIFA, voru menn í salnum sem vildu frekar hafa mig lokaðan í fangelsi en í forsetastóli og menn verða að geta tekið við höggum ef þeir ætla sér að ná langt í þessu," sagði Blatter.