Stöðvaði umferð á gatnamótum vegna símtals

Lögreglan á höfuðborgarsvæðinu þurfti í gær að hafa afskipti af ökumanni sem tafði umferð á gatnamótum. Maðurinn hélt kyrru fyrir eftir að græna ljósið kom á umferðarljósin en svo vildi til að lögreglubíll var meðal þeirra sem biðu fyrir aftan bílinn.

Þegar að var gáð var maðurinn að tala síma og virtist að sögn lögreglu allt að því hissa á þessum afskiptum. Ökumaðurinn sagðist ekki hafa hringt úr símanum heldur hefði verið hringt í hann, rétt eins og það afsakaði háttalagið.

Auk þessa stöðvaði lögregla 16 ökumenn í gær vegna hraðaksturs, þar á meðal konu á áttræðisaldri sem ók á tæplega 50 kílómetra hraða í íbúðargötu í Hafnarfirði þar sem hámarkshraði er 30.