Liverpool sækir um undanþágu vegna Mascherano

Enska úrvalsdeildarfélagið Liverpool hefur ritað FIFA bréf þar sem það sækir um undanþágu fyrir miðjumanninn Javier Mascherano hjá West Ham og vonast til að hann fái grænt ljós á að spila með þriðja liðinu á leiktíðinni. Liverpool mun líklega ganga frá lánssamningi við leikmanninn ef félagið fær málið í gegn.

Mascherano hefur ekki spilað nema sex mínútur síðan í október og hefur farið fram á að fá að fara frá West Ham. Koma hans til félagsins hefur verið tómt klúður, en hann kom á Upton Park þann 31. ágúst ásamt félaga sínum Carlos Tevez.