Utanríkisráðherra ekki ofboðið af forseta Íslands

Valgerður Sverrisdóttir utanríkisráðherra telur að ekki verði neinir eftirmálar af því að forseti Íslands settist í þróunarráð Indlands, án samráðs við utanríkisráðuneytið, en telur að brýna þurfi samskiptareglur forsetans og ráðuneytisins. Formaður utanríkismálanefndar hefur kallað utanríkisráðherra á fund nefndarinnar vegna forsetans.

Það kom mörgum í ríkisstjórn Íslands og á Alþingi á óvart þegar forseti Íslands tilkynnti á þriðjudag í síðustu viku, að hann hefði tekið sæti í þróunarráði Indlands. Þetta gerði forsetinn án samráðs við utanríkisráðuneytið. Utanríkisráðherra segir báða aðila sammála um að skýra þurfi boðleiðir milli embættanna.

Valgerður Sverrisdóttir utanríkisráðherra vill ekkert fullyrða um það hvort forsetinn hafi með þessu farið út fyrir sitt verksvið.

"Aðalatriðið er að við vitum meira um það sem forsetinn aðhefst og hvað hann hefur í huga og það er líka gagnkvæmt. Það er einnig mikilvægt að forsetinn þekki vel til þess sem starfað er inni í utanríkisráðuneytinu og hvað þar er framundan og hvaða stefna þar er uppi. Því við erum ein þjóð í einu landi og mikilvægt að samræmi sé í málflutningi," segir utanríkisráðherra.

Halldór Blöndal formaður utanríkismálanefndar er ekki sáttur við framferði forsetans og hefur kallað utanríkisráðherra á fund nefndarinnar næst komandi miðvikudag.

"Ég sé það ekki fyrir mér hvernig forseti Íslands getur verið í opinberu starfi fyrir aðra þjóð. Ef þetta er ekki á vegum inverska ríkisins, er það þá á vegum einkaaðila? Og hvaða einkaaðilar standa þá að þessu ráði. Eru þetta launuð störf', spurði Halldór í hádegisviðtalinu á Stöð tvö í dag.

Utanríkisráðherra ítrekar að skýra verði samskiptareglur embættanna en henni hafi þó ekki verið ofboðið.

"Nei, nei. Þetta er ekki þannig mál að neinum sé ofboðið held ég. Það er þetta engu að síður mál sem við sem sitjum í ríkisstjórn teljum að verði að vera í lagi. Og eftir viðtöl milli ráðuneytisins og ráðuneytisins er ég sannfær um að þannig er það líka hinum megin. Þannig að þetta er fyrst og fremst að mínu mati mál sem við getum haft í betra farvegi. Þannig að þá þurfi ekki að vera um neinar uppákomur að ræða.

Og eftirmálar engir eða hvað?

Ég get ekki séð það, sagði Valgerður Sverrisdóttir utanríkisráðherra.