Dæla beint í flugvélar frá Helguvík

Öllum flutningum á þotueldsneyti um höfuðborgarsvæðið og Reykjanesbraut til Keflavíkurflugvallar verður hætt, eftir að Esso tók við eldsneytissölunni á Keflavíkurflugvelli á miðnætti. Þess í stað verður því dælt frá olíuhöfninni í Helguvík og beint á flugvélarnar.

Olíufélagið Esso tók á miðnætti við eldsneytisafgreiðslu til flugvéla á Keflavíkurflugvelli af olíufélaginu Skeljungi. Sú breyting að hægt verður að dæla eldsneytinu beint frá olíubirgðastöð NATO og Bandaríkjahers í Helguvík helgast af því að ríkið hefur nú umsjón með mannvirkjunum og getur samið um afnot af þeim.

Hingað til hefur allt eldsneytið verið flutt úr olíubirgðastöðinni í Örfyrisey í stórum tankbílum í gegnum höfuðborgarsvæðið og suður á völl með tilheyrandi slysa- og mengunarhættu. Stóru dráttarbílarnir hafa þurft að fara allt að 3.500 ferðir á ári, eða sjö þúsund ferðir að bakaleiðinni meðtalinni.

Það eru að meðaltali tíu stórir og fullhlaðnir olíuflutningabílar á dag og jafn margir tómir. En nú hverfa þessir bílar sem sagt úr umferðinni.