Gríðarlegar skemmdir á bílum í Hafnarfirði

Gríðarleg skemmdarverk voru unnin á tugum og jafnvel hundruðum bíla í Hafnarfirði í nótt og enn streyma tilkynningar til lögreglu um ný og ný tilvik. Nú þegar er talið að tjónið nemi tugum milljóna króna.

Tilkynningum tók að rigna inn til lögreglu strax í birtingu. Fyrst úr hesthúsasvæðinu í Almannadal. Þar hafði verið ráðsit á marga bíla frá verktökum sem eru að reisa þar hesthús, rúður brotnar í bílunum og í hesthúsum, sem búið var að glerja.

Síðan fóru að berast fréttir úr Hellulhverfinu, sem er iðanðarhverfi austan við Álverið í Straumsvík. Þar höfðu skemmdarvargar gengið berserksgang og ekki aðeins brotið rúður í bílum og dældað þá heldur höfðu þeir rekið járnteina í gegnum hurðir og vélarhlífar alveg inn í bílana. Þar er mikið af stórum vörubílum, steypubílum og ýmsum vinnuvélum, sem líka urðu fyrir barðinu á skemmdarvörgunum.

Enn eru að berast tilkynningar um skemmdarverk og tjón og er fjöldi lögreglumanna að rannsaka vettvang. Ljóst þykir að tjónið hlaupi nú þegar á mörgum milljónum ef ekki tugum milljóna og hefur enginn verið handtekinn enn sem komið er. Ekki liggur fyrir hvort skemmdarvargarnir hafa einhvers staðar náðst á eftirlitsmyndavélar.