Á ekki að snúast um allsherjar refsigleði

Forystumenn Samtaka atvinnulífsins gagnrýna harðlega fyrirhugaðar breytingar á samkeppnislögum og segja að refsigleði hafi ráðið för við samningu þeirra. Þá múlbindi frumvarpið forráðamenn samtakanna, þar sem skoðanir þeirra mætti túlka sem óeðlileg afskipti af samkeppni.

Fyrir Alþingi liggja frumvörp um breytingar á annars vegar lögum um fjármálastarfsemi og hins vegar á samkeppnislögum. Innan Samtaka atvinnulífsins (SA) og í fjármálaheiminum ríkir óánægja með lítið samráð löggjafans og stjórnvalda við þessi samtök. Á kynningarfundi í morgun kom fram að við brot á lögum um fjármálafyrirtæki sé verið að tífaldist sektir á einstaklinga og tuttugu og fimmfaldist á fyrirtæki og sömuleiðis sé lengt í refsivist fyrir brot á lögunum. Þá megi túlka það svo að ef forráðamenn Samtaka atvinnulífsins setji fram skoðanir á t.d. húsnæðismarkaðnum, megi túlka þær sem óeðlileg áhrif á markaðinn.

"Það má alveg halda því fram að það séu ýmsir aðilar á markaðnum sem telja að sér vegið þegar við höfum slíkar skoðanir. Og að þeir geti leitað til samkeppnisyfirvalda og látið á það reyna hvort að þær skoðanir sem við setjum fram séu til þess að hvetja til brota á samkeppnislögunum," segir Vilhjámur Egilsson framkvæmdastjóri SA.

Þá segir Vilhjálmur að úttekt lögmanns samtakanna leiði í ljós að verið sé að ganga lengra í refsingum á einstaklinga og fyrirtæki en gengur og gerist í nágrannalöndum.

"Samkeppnislögin eru til staðar fyrir atvinnulífið en ekki gegn því," segir Vilhjálmur.

Og fyrir almenning?

"Nákvæmlega fyrir allt samfélagið. Og þess vegna þurfa þessar reglur að vera til. Þær þurfa að vera uppbyggjandi og það þarf að vera hægt að vinna með þeim. En þetta á ekki að vera ein stór allsherjar refsigleði," segir framkvæmdastjóri Samtaka atvinnulífsins.