Svíþjóð og Tyrkland á EM

Svíar og Tyrkir tryggðu sér í kvöld sæti í úrslitakeppni EM 2008 í Austurríki og Sviss. Liðin unnu bæði sína leiki.

Svíþjóð vann í kvöld Letta, 2-1. Marcus Allbäck kom Svíum yfir snemma í leiknum en Juris Laizans jafnaði metin skömmu síðar. Það var svo Kim Källstrom sem skoraði sigurmarkið í síðari hálfleik og gulltryggði farseðilinn á EM.

Svíar hefðu reyndar mátt tapa þar sem Spánverjar unnu Norður-Íra á heimavelli, 1-0, með marki Xavi.

Nihat var hetja Tyrkja þegar liðið lagði Bosníu, 1-0, á heimavelli. Jafntefli hefði ekki dugað Tyrkjum þar sem Norðmenn unnu sinn leik örugglega, 4-1, gegn Möltu.

Norðmenn töpuðu fyrir Tyrkjum á laugardaginn og glötuðu þar með sínu besta tækifæri til að komast á EM.