Vill börn í forgang frekar en tónlistarhús

„Við höfum vakið máls á kjörum leikskólastarfsmanna á hverjum einasta bæjarstjórnarfundi sem hefur verið haldinn í haust," segir Guðríður Arnardóttir oddviti Samfylkingarinnar í bæjarstjórn Kópavogs.

Hún segir að tillögur sem fluttar hafi verið um hækkun launa hafi ýmist verið felldar af meirihlutanum, þeim frestað eða vísað til umsagnar einhverra annarra, þar sem þær hafi dagað uppi.

Guðríður segir að leikskólastarfsmenn hjá Kópavogsbæ fái greitt allt að þrjátíu þúsund krónum minna á mánuði en starfsmenn leikskóla í öðrum sveitarfélögum. „Nú er fólk byrjað að segja upp, þannig að málið þolir enga bið," fullyrðir Guðríður.

Guðríður segir að bærinn sé í samkeppni um hæft starfsfólk og bærinn hafi efni á því að vera í fremstu röð sveitarfélaga. Máli sínu til stuðnings bendir hún á að Kópavogsbær hafi metnaðarfull áform um það að byggja nýtt tónlistarhús. „En ég kýs börnin frekar en tónlistarhúsið, ef ég þarf að velja," segir Guðríður að lokum.