Tekist á um Baugsmálið

Skattrannsóknastjóri segir að ríkislögreglustóri hafi ekki lagaheimildir til að krefja embætti sitt um upplýsingar um skattamál einstaklinga, sem tengjast Baugsmálinu. Saksóknari efnahagsbrota hjá Ríkislögreglustjóra segir hins vegar að sér beri að sjá til þess að sekir menn sæti refsimeðferð.

Þessi óvenjulega togstreita er tilkomin vegna þeirrar óskar Ríkislögreglustjóra að ríkisskattstjóri afhendi honum upplýsingar um skattamál níu einstaklinga, sem tengjast Baugsmálinu. Þeirri ósk synjaði skattrannsóknastjóri í desember með þeim rökum að að það sé skattrannsóknarstjóra að rannsaka meint brot á skattalögum og yfirskattanefndar að úrskurða um sektir, nema þegar máli sé vísað til opinberrar rannsóknar hjá lögreglu, sem ekki hafi verið gert í þessu tilviki. Engin fordæmi séu fyrir slíku og mannréttindasáttmáli Evrópu leggi bann við því að manni sé gerð refsing tvisvar.

Einnig segir í bréfi skattrannsókanstsjóra, sem Fréttablaðið birtir úr í dag, að ætla megi að tiltekin háttsemi sem skattrannsóknastjóri vísaði til opinberrar meðferðar sem skýru broti á skattalögum, hafi farið forgörðum í meðförum ríkislögreglustjóra. Þar er vísað í þann hluta Baugsmálsins þar sem Jón Ásgeir Jóhannesson var ákærður fyrir fjársvik og umboðssvik vegna kaupa Baugs á Vöruveltunni, sem átti 10-11 verslanakeðjuna.

Helgi Magnús Gunnarsson nýr saksóknari Ríkislögreglustjóra segir hinsvegar í viðtali við Fréttablaðið að Skattarannsóknastjóri geti ekki girt fyrir það hlutverk lögreglu og ákæruvalds, sem getið sé um í lögum um meðferð opinberar mála.