Þriggja mánaða fangelsi fyrir fólskulega árás

Tveir karlmenn um tvítugt þurfa aðeins að sitja í þrjá mánuði í fangelsi fyrir fólskulega árás gegn jafnaldra sínum. Þeir rændu honum við þriðja mann og óku með hann upp í Heiðmörk þar sem þeir gengu í skrokk á honum. Maðurinn hlaut lífshættulega áverka.

Það var hestamaður sem kom að manninum þar sem hann hafði verið skilinn eftir í Heiðmörk. Hann var með áverka um allan líkamann, skólaus og í rifnum fötum. Árásarmennirnir höfðu slegið höfði hans ítrekað í jörðina og traðkað á brjóstkassa hans og maga. Maðurinn var fluttur á slysadeild með innvortis blæðingar sem hefðu getað reynst lífshættulegar. Hann neitaði að segja til árásarmannanna og bar við ótta við þá.

Árásarmennirnir þekktu fórnarlambið lítið. Þeir komu á heimili hans í leit að öðrum manni sem þeir sögðu skulda sér peninga. Fórnarlambið vildi ekki segja til hans og fór með þeim út í bíl til að ræða við þá. Mennirnir óku þá af stað. Þegar þeir komu að Vífilstaðarvatni stöðvuðu þeir bifreiðina og gengu í skrokk á honum, að svo búnu lokuðu þeir hann í farangursgeymslu bílsins. Þeir héldu svo ferð sinni áfram upp í Heiðmörk þar sem þeir misþyrmdu honum meira.

Einn árásarmannanna hefur áður hlotið dóm fyrir líkamsárásir. Hann var dæmdur í þriggja ára skilorðsbundið fangelsi síðasta vor en þar sem það var skömmu eftir árásina uppi í Heiðmörk hefur það ekki áhrif á dóminn í dag.

Dómurinn taldi brotin fólskuleg og ófyrirleitin og algjörlega án tilefnis. Hins vegar er ungur aldur árásarmannanna, sem allir voru undir tvítugu þegar brotin voru framin, til refsimildunar.

Einn árásarmannanna hlaut fimmtán mánaða fangelsi, þar af tólf mánuði skilorðsbundið fyrir árásina. Sá sem einnig tók þátt í árásinni fékk tólf mánaða fangelsi þarf af níu mánuði skilorðsbundið. Hvor um sig þarf því aðeins að sitja þrjá mánuði í fangelsi. Þriðji maðurinn, sem ók bílnum, var aðeins dæmdur fyrir frelsissviptingu og hlaut tveggja mánaða skilorðsbundinn dóm.

Þeir þurfa jafnframt að greiða fórnarlambinu um 450 þúsund krónur.