Forsætisráðherra segir Byrgismálið hneyksli

Forsætisráðherra segir að Byrgismálið sé bæði fjárhagslegt og mannlegt hneykslismál, en telur að félagsmálaráðherra þurfi ekki að segja af sér embætti vegna þess. Málið sé allt til rannsóknar hjá réttum aðilum.

Valdimar Leó Friðriksson þingmaður Frjálslynda flokksins spurði forsætisráðherra út í málefni Byrgisins á Alþingi í gær og vísaði þar til laga um ráðherraábyrgð.

"Hver ber að hans mati ábyrgð á mistökum í þessu máli og telur hæstvirtur forsætisráðherra að félagsmálaráðherra eigi að segja af sér vegna Byrgismálsins," spurði Valdimar Leó.

"Auðvitað á hæstvirtur félagsmálaráðherra ekki að segja af sér út af þessu máli. Það er hann sem í krafti síns embættis sem hefur beitt sér fyrir því að það er farið yfir þetta mál með þeim hætti sem nauðsynlegt er," svaraði forsætisráðherra.

Hann vildi hins vegar að stjórnarandstaðan rifjaði upp hvernig þingmenn greiddu atkvæði um fjárveitingar til Byrgisins árið 2003 og þær heitstrengingar sem margir stjórnarandstöðuþingmenn hefðu þá haft uppi til að þrýsta á fjárveitingar til Byrgisins. Málið væri nú til rannsóknar hjá réttum aðilum og vonandi kæmi hið sanna í ljós varðandi alla þætti þess. Pottur hefði þó verið brotinn í eftirliti félagasmálaráðuneytisins.

"Hvort það er einhverjum einstökum manni að kenna vil ég auðvitað ekki dæma um. En ef menn vilja beita lögum um ráðherraábyrgð hér þá er það nokkuð seint gert, því þeir tveir félagsmálaráðherrar sem komu að þessu máli eru nú báðir hættir.," sagði Geir H Haarde forsætisráðherra.