Laxaseiðum eytt á Laxeyri

Nýrnaveiki kom upp í seiðum og hrognum í laxeldisstöðinni á Laxeyri. Þeim hefur öllum verið eytt. Veikin hefur ekki dreift sér um stöðina.

Fram kemur á fréttavefnum Skessuhorn að um sé að ræða seiði úr Norðurárstofni sem átti að sleppa í ánna árið 2008.

Bakterían sem veldur veikinni er í íslenskri náttúru og árlega koma upp nokkur tilfelli í stöðinni. Nóg er af seiðum til að sleppa í ánna fyrir árið í ár en sökum veikinnar verður engum seiðum sleppt árið 2008.

Haft er eftir Sigurjóni Valdemarssyni, formanni Veiðifélags Norðurár, að seiðabúskapur hafi verið afar góður undanfarin ár og komi ekkert óvænt upp á ætti þetta óhapp ekki að skipta miklu máli.