Skjólstæðingar Byrgisins fái tafarlaust aðstoð

Félagsmálanefnd Alþingis samþykkti einróma á fundi sínum í dag að skora á ríkisstjórnina að grípa til aðgerða vegna málefna Byrgisins sem voru til umræðu á fundi nefndarinnar í dag.

Í tilkynningu frá félagsmálanefnd er skorað á ríkisstjórnina að fela Landlæknisembættinu strax að mynda starfshóp til að ræða við fyrrverandi skjólstæðinga Byrgisins og tryggja að þeim verði tafarlaust veitt sú aðstoð sem þurfa þykir innan heilbrigðis- og félagslega kerfisins.

Þá sé einnig mikilvægt að starfshópurinn hafi við störf sín samráð við Barnaverndarstofu, lögreglu og fagfólk á sviði áfengis- og fíkniefnameðferðar. Þá segir í tilkynningunni að nú standi yfir viðræður félagsmálaráðuneytis og velferðarsviðs Reykjavikurborgar um þessi málefni. Félagsmálanefnd muni taka til umfjöllunar niðurstöðu þeirra viðræðna um leið og þær liggi fyrir.

Fulltrúar Samfylkingarinnar í félagsmálanefnd bókuðu til viðbótar að taka yrði strax á fleiri þáttum, þar meðal að allar meðferðastofnanir sem teljast veita meðferð við áfengis- og vímuefnafíkn yrðu strax færðar undir yfirumsjón heilbrigðisyfirvalda.

Tilkynningu félagsmálanefndar má sjá í heild sinni hér að neðan.