Óskað eftir áframhaldandi gæsluvarðhaldi vegna meintra kynferðisbrota

Lögreglan á höfuðborgarsvæðinu óskaði eftir því í dag að gæsluvarðhald yfir 26 ára gömlum karlmanni, sem grunaður er um að hafa áreitt fjórar stúlkur á aldrinum 5-12 ára í Vogahverfi um miðjan síðasta mánuð, yrði framlengt um einn og hálfan mánuð.

Maðurinn hefur setið í gæsluvarðhaldi frá 17. janúar en rannsókn lögreglunnar hefur leitt í ljós vísbendingar um að hann hafi áreitt fleiri ung börn. Að sögn Björgvins Björgvinssonar hjá kynferðisbrotadeild lögreglunnar er enn verið að rannsaka þau mál en maðurinn hefur ekki játað neitt á sig.

Þá sendi lögreglan DNA-sýni til Noregs til rannsóknar vegna gruns um að maðurinn hefði brotið alvarlega gegn fimm ára stúlkunni á leikvelli í Vogahverfi en niðurstöður þeirrar rannsóknar liggja ekki fyrir.