Húseignir skemmdar með veggjakroti í miðborginni

Einhverjir virðast í nótt hafa fengið útrás fyrir skemmdarfísn sína með úðabrúsa og fyrir barðinu urðu nokkrar húseignir við Skólavörðustíg og Bergstaðastræti, bæði verslanir og íbúðarhúsnæði. Að utan leit Skartgripaverslunin Mariella svona út í morgun, en eigendur hennar, svissneskin hjónin María og Jóhannes Langenbacher, segja að þetta sé í þriðja sinn frá áramótum sem svona gerist. Í þeirra tilviki er tjónið verulegt því marmarinn utan á verslun þeirra drekkur í sig litinn. Það er því hvorki hægt að mála yfir né þrífa hann alveg af. Þau komu fyrst til Íslands sem ferðamenn en stofnuðu búðina fyrir fimm árum af því að hér leið þeim svo vel.