Valgerður á fundi utanríkismálanefndar í morgun

Valgerður Sverrisdóttir utanríkisráðherra var kölluð fyrir utanríkismálanefnd Alþingis í morgun til að ræða um setu forseta Íslands í þróunarráði Indlands.

Formaður utanríkismálanefndar Alþingis, Halldór Blöndal, hefur gagnrýnt setu forseta Íslands í þróunarráði Indlands og sagt að forsetinn eigi ekki að taka að sér opinber trúnaðarstörf fyrir önnur ríki.

Nú er málið komið til kasta Alþingis með því að þingnefndarformaðurinn hefur kallað utanríkisráðherra á fund nefndarinnar til að ræða um málið.

Samkvæmt dagskrá fundarins stóð til að ræða almennt um samskipti utanríkisráðuneytis og embættis forseta Íslands en einnig var ætlunin að Valgerður greindi nefndarmönnum frá viðskiptasamningum við önnur ríki og Evrópumál í vinnslu, þarf með talið stækkun Evrópska efnahagssvæðisins.