Sakaðir um að ala á andúð gegn útlendingum

Frjálslyndi flokkurinn elur á andúð gegn útlendingum og það kom skýrt fram í ræðu Guðjóns Arnar Kristjánssonar á flokkþingi Frjálslynda flokksins. Þetta sagði Sæunn Stefánsdóttir, þingmaður Framsóknarflokksins, við upphaf þingfundar í dag. Sæunn vísaði sérstaklega til þess að formaðurinn varaði við því að útlendingar bæru hingað berklasmit.

Allir þingmenn Frjálslynda flokksins vísuðu málflutningi Sæunnar á bug og sögðu Framsóknarflokkinn vera að breiða yfir eigin vanrækslu í málaflokknum. Þá bentu þeir á að varað hefur verið við berklasmiti útlendinga bæði farsóttarfréttum Landlæknisembættisins og af framkvæmdastjóra Alþjóðaheilbrigðisstofnunarinnar.

Siv Friðleifsdóttir, heilbrigðisráðherra, sagði öflugt eftirlit með berklasmiti á Íslandi og þessum málum vel sinnt. Hún sagði málflutning Frjálslynda flokksins vera til þess gerðan að tortryggja útlendinga almennt.

Sæunn bendi þeirri spurningu til hinna stjórnarandstöðuflokkana hvort þeir ætluðu að greiða götu Frjálslynda flokksins í ríkisstjórn.