Leigubílstjóri: Leigubílstjórar nenna ekki að vera í miðbæ Reykjavíkur

Það er bull og vitleysa að leigubílstjórar þori ekki í miðbæ Reykjavíkur um helgar vegna ástandsins þar, eins og Kristján L. Möller, samgönguráðherra sagði í gær á Alþingi. Staðreyndin er sú að leigubílstjórar nenna ekki í miðbæinn um helgar. Þetta segir Lúðvík Friðriksson, leigubílstjóri hjá Hreyfli sem segist vera orðinn langþreyttur á umræðunni um ástandið í miðbænum.

„Ég veit ekki hvað menn ættu að vera hræddir við. Ég hef keyrt leigubíl í átta ár og lendi aldrei í vandræðum í miðbænum á nóttinni," segir Lúðvík og bætir því við að hann lenti miklu frekar í vandræðum með kúnna í úthverfum borgarinnar. „Ég held að þeir sem tala hæst um slæmt ástand í miðbænum viti einfaldlega ekkert hvað gerist á götunni." Lúðvík segir leigubílstjóra einfaldlega vera mannlega og þeir séu ekkert öðruvísi en annað fólk með það að þeir vilji helst ekki vinna næturvinnu um helgar ef þeir komast hjá því.

„Ég keyri reyndar allar helgar því ég vil þjónusta þetta fólk. Flestir hugsa þetta hins vegar þannig að ef þeir þurfa ekki að keyra um helgar þá sleppa þeir því bara." Þá segir Lúðvík að gott atvinnuástand geri það að verkum að erfiðlega gangi að fá menn í afleysingar á bílana um helgar þannig að færri bílar séu á ferðinni.

Að sögn Lúðvíks gera menn þó allt of mikið úr þessum meinta skorti á leigubílum í miðbænum. „Það myndast auðvitað álagspunktur en hann stendur tiltölulega stutt yfir. Röðin sem myndast er yfirleitt bara á aðfaranótt sunnudagsins og stendur þá frá þrjú til svona sex. En þetta er ekkert óeðlilegt. Það eru raðir í Ríkinu á föstudögum og traffíkin á götunum eykst líka á föstudagseftirmiðdögum. Ætla Kristján Möller og félagar á Alþingi að tvöfalda göturnar í Reykjavík til þess að koma í veg fyrir það?"

Til skamms tíma voru verðir í leigubílaröðinni í Lækjargötu og Lúðvík segir að það hafi verið til bóta. Þeir hafi haldið röð og reglu á fólkinu sem beið eftir bíl í misgóðu ástandi. „En þessum strákum voru auðvitað borguð lúsarlaun þannig að þetta gekk ekki til lengdar. Það verður að borga mönnum sæmilega svo þeir nenni í svona vinnu."

Lúðvík segir hugmyndir um að fjölga leigubílaleyfum um helgar einnig mjög varhugaverðar. Það myndi bara þýða að fleiri væru um hituna og þá myndi enn frekar draga úr líkum á því að menn nenni í bæinn á nóttunni.